اداکارہ مشی خان دن بدن بڑھتی مہنگائی اور حکومت کی کارکردگی پر برس پڑیں۔ مشی خان نے گزشتہ روز اپنے ٹوئٹر اکاؤنٹ سے ایک ویڈیو پیغام جاری کیا جس میں انہوں نے کہا کہ مجھے سمجھ نہیں آتی کہ موجودہ حکومت اپنی نااہلی کے کیسے کیسے جواز پیش کر رہی ہے۔
اداکارہ نے کہا کہ حکومت، پاکستان کا موازنہ دوسرے ممالک سے یہ کہہ کر رہی ہوتی ہے کہ امریکا، افریقا، انگلینڈ اور روس میں پیٹرول کی قیمتوں میں اضافہ ہوگیا ہے، حکومت وہاں کا رہن سہن دیکھے۔ مشی خان نے کہا کہ ان ممالک میں گھر میں صفائی کرنے والی خاتون بھی اپنی گاڑی میں آتی ہے، پاکستان میں ایک منیجر اپنی تنخواہ میں مہینہ کس طرح پورا کرتا ہے۔
یہ اُسی سے پوچھیں، آپ لوگوں کو نظر کا دھوکہ ہے جو آپ باہر کے ممالک کا پاکستان سے موازنہ کرتے ہیں۔ اپنے ویڈیو پیغام میں اداکارہ نے عوام کو مہیا کی جانے والی بنیادی ضروریات سے متعلق کہا کہ پاکستان میں آپ لوگوں نے روٹی، پانی کو بہت مہنگا کر دیا ہے۔ مشی خان نے کہا روز ٹی وی پر حکومت کے خواتین و حضرات آکر ہمیں ماموں بناتے ہیں اور نکل جاتے ہیں، آپ لوگ کر کیا رہے ہیں۔
آپ لوگوں کو پتہ ہی نہیں کہ آپ کیا کر رہے ہیں بس ایک دوسرے پر الزامات لگا رہے ہیں، پچھلی حکومت کو کہہ رہے ہیں، آپ لوگوں نے خود کیا کیا ہے۔ خیال رہے اداکارہ مشی خان اس سے قبل بھی حکومت کو شدید تنقید کا نشانہ بنا چکی ہیں۔ ان کا کہنا تھا کہ ’میں نے خودکشی کرنے والے شخص کی ویڈیو دیکھی جس کے بعد سے صدمے کی کیفیت سے دوچار ہوں، میری طبیعت یہ واقعات دیکھ کر عجیب ہورہی ہے کہ واقعی یہ سب ہورہا ہے‘۔
انہوں نے کہا کہ ابھی کچھ دنوں قبل ایک صحافی نے نوکری سے نکالے جانے پر مہنگائی کے باعث اپنی جان دے دی تھی۔ مشی نے حکومتی اداروں سے درخواست کرتے ہوئے کہا کہ ’خدارا ہم سب کی حکومت سے اپیل ہے کہ کھانے پینے کی عام اشیاء کو سستا کریں، لوگ جان سے جارہے ہیں اور آپ لوگ پچھلی حکومتوں کا رونا رورہے ہیں، بس کردیں، اس قوم پر رحم کھائیں، لوگ خودکشی کررہے ہیں، قوم کا دل رکھیں جو اتنی بڑی بڑی باتیں کرتے ہیں‘۔