بول انٹرٹینمنٹ نے ’خوش رہو پاکستان‘ ’گیم شو ایسے چلے گا‘ اور ’بول ہاؤس‘ کی کامیابی کے بعد بچوں کیلیے ’گیم شو‘ لانے کا اعلان کردیا۔ پاکستان کے نمبر ون انٹرٹینمنٹ چینل ’بول انٹرٹینمنٹ‘ اپنے ناظرین کی دلچسپی کو مد نظر رکھتے ہوئے نت نئے پروگرامز لانچ کرتا رہتا ہے جو ان کے چاہنے والوں کو بہت پسند آتے ہیں اور وہ بے صبری دوسرے پروگرامز کا انتظار کررہے ہوتے ہیں۔
بول انٹرٹینمنٹ پر نشر ہونے والے پروگرامز اور خاص طور پر گیم شوز کی دلچسپ بات ہے کہ اس میں نہ صرف عوام کی بڑی تعداد شرکت کرتی ہے بلکہ انہیں انعامی رقم سمیت چھوٹے اور بڑے تحائف بھی دیے جاتے ہیں جس کی وجہ سے زیادہ سے زیادہ لوگ ان پروگرامز میں شرکت کی خواہش ظاہر کرتے ہیں۔
یہ بھی پڑھیں؛ سانپ نے لڑکی کو جکڑلیا، ویڈیو وائرل
خیال رہے اس وقت بول انٹرٹینمنٹ پر فیصل قریشی کے پروگرام ’خوش رہو پاکستان‘ ، اداکار دانش تیمور کے پروگرام ’گیم شو کیسے چلے گا‘ اور عامر لیاقت کے پروگرام ’بول ہاؤس‘ کو بے حد پسند کیا جارہا ہے۔
سوشل میڈیا پر بھی صارفین کی جانب سے ان پروگرامز سے متعلق پسندیدگی کا اظہار کیا جاتا ہے اور سیکڑوں لوگ ان پروگرامز میں شرکت کی خواہش ظاہر کرتے ہیں جن میں بڑی تعداد میں بچے بھی شامل ہوتے ہیں۔ بول انتظامیہ نے اپنے پروگرامز کی بچوں میں مقبولیت کو دیکھتے ہوئے خصوصی طور پر بچوں کے لیے گیم شو لانے کا اعلان کردیا اور اس حوالے سے اپنے آفیشل یوٹیوب پر پروگرام کا پرومو بھی جاری کیا ہے۔
یہ بھی پڑھیں؛ خوش رہوپاکستان: فیصل قریشی لائے سب سے الگ گیم شو
ویڈیو میں صرف بچوں کو کھیلتے اور اچھلتے کودتے دکھایا گیا ہے تاہم پروگرام کس نوعیت کا ہوگا اور اس میں کس قسم کے گیمز شامل ہوں گے یا پھر اس کی میزبانی کون کرے گا، ان سب سوالات کے جوابات کے لیے ناظرین کو ابھی مزید انتظار کرنا ہوگا۔
واضح رہے حال ہی میں بول انٹرٹینمنٹ پر ڈاکٹر عامر لیاقت حسین کی میزبانی میں ’بول ہاؤس‘ شروع کیا اور پہلی ہی قسط نشر ہونے کے بعد پروگرام نے مقبولیت کے تمام ریکارڈز توڑ دیے اور پروگرام کے حوالے سے لوگوں کے تجسس میں اضافہ ہوگیا اور وہ بے صبری سے اگلی قسط کا انتظار کرنے لگے۔